Biznesmeni Jurgen Molla është kreu i grupit kriminal që trafikonte drogë në disa shtete të Ballkanit.
Përveç aktivitetit kriminal të trafikut të lëndëve narkotike që e kishte pasuruar, Molla kishte investuar në ndërtime dhe shitjen e apartamenteve.
Prokuroria ka në dorë dosjen hetimore ndaj tij, ku janë të përfshira edhe përgjimet e bisedave që ka patur me personat e tjerë. Policia e Shtetit njoftoi dje se në bashkëpunim me Prokurorinë e Krimeve të Rënda, janë arrestuar 14 persona.
Njëri ndër ta është edhe biznesmeni Jurgen Molla, i cili nuk e priti mirë momentin kur iu vunë prangat. Gjatë ndërhyrjes së policisë për arrestimin e tij, ai ka humbur ndjenjat.
Kanë qenë policë të maskuar që ndërhynë me vrull për të bërë prangosjen e kreut të grupit kriminal. Sapo biznesmeni pa efektivët, atij i ra të fikët, kjo për shkak edhe se disa ditë më parë kishte bërë ndërhyrje kirurgjikale në stomak, shkruan sot gazeta ‘Shqiptarja.com’.
