Belgjika, Luksemburgu dhe Suedia kërkojnë përjashtimin e partisë nacionaliste të kryeministrit hungarez Viktor Orban nga grupi i Partive Popullore Europiane, pas sulmeve të këtij të fundit ndaj Brukselit. Por nga ana tjetër, disa politikanë duan t’ia mbajnë derën hapur forcave sovraniste, duke parë që shumë shpejt zhvillohen zgjedhjet për Parlamentin Europian.
Sulmet e forta që Orban bëri ndaj Komisionit Europian dhe presidentit Jean-Claude Juncker, prodhuan dy lajmë kryesore: përgjigjen e Brukselit dhe kërkesën për përjashtimin e “Fidsz”, partisë së Orban, nga grupi i Partive Popullore Europiane.
Në Hungari ka një fushatë të mirëfilltë propagandistike, ku rrugët e qyteteve kryesore janë mbushur me postera ku shkruhet “Edhe ti ke të drejtën ta dish se çfarë po projektohet në Bruksel”, ndërsa një letër me këtë nëntitull, i ka dërguar Orban të gjithë qytetarëve hungarezë, duke hedhur teza konspiracioni mes një akordi të Bashkimit Europian me George Soros për të lejuar ardhjen masive të emigrantëve në BE.
Nga ana e tij, Komisioni Europian ka përgënjeshtruar pikë për pikë, të gjitha pretendimet e Viktor Orbanit. “Edhe ne kemi besimin se qytetarët duhet të njohin të vërtetën mbi çfarë po bën Bashkimi Europian. Por besojmë se meritojnë të vërtetën, jo trillime. Fushata e qeverisë hungareze shtrembëron të vërtetën dhe kërkon të japë një imazh të zi të një komploti sekret për të sjellë më shumë emigrantë në Europë. E vërteta është se nuk ka asnjë konspiracion. George Soros nuk ka të bëjë fare me këtë çështje”, është shprehur Brukseli./Opinion.al
