Përfaqësuesi i mazhorancës në Këshillin Politik, Damian Gjiknuri deklaroi pas përfundimit të mbledhjes së sotme se opozita nuk pranoi të diskutonte në lidhje me hapjen e listave.
Lidhur me këtë deklaratë ka reaguar opozita, e cila shprehet se Gjiknuri ka gënjyer opinionin publik, pasi opozita ka pranuar të diskutojë çdo çështje që lidhet me zgjedhjen dhe që ky diskutim të shqyrtohet në Këshillin Politik.
Në reagim thuhet se opozita nuk bëhet pjesë e çështjeve të njëanshme apo të paracaktuara më parë nga mazhoranca.
Më tej, opozita thekson se do të përfshihet në të gjitha diskutimet të cilat nuk prekin marrëveshjen e 5 qershorit. Po ashtu, opozita ka kërkuar që mbledhja e ardhshme e Këshillit Politik të mbahet ditën e nesërme në orën 17: 00.
LEXO EDHE: Gjiknuri: PD refuzon që listat të trajtohen në Këshillin Politik
E-maili i opozitës dërguar Gjiknurit
Z. Gjiknuri,
Duke ndjekur deklarimin tuaj publik dhe të Kryetarit të Partisë Socialiste, shprehim keqardhjen tonë për dezinformimin e opinionit publik në lidhje me qëndrimin e opozitës në mbledhjen e sotme të Këshillit Politik. Ne nuk kemi refuzuar të diskutojmë asnjë çështje. Opozita ka kërkuar, që çdo çështje që lidhet me zgjedhjen, të diskutohet dhe shqyrtohet në Këshill.
Sot në mëngjes në Parlament, Kryetari i Partisë Socialiste pohoi se amendamenti kushtetutes i njënanshëm që është depozituar në Kuvend, NUK NDRYSHON, sepse procedura parlamentare nuk e lejon!!! Nëse amendamenti kushtetues i njëanshëm nuk ndryshon, sepse Rregullorja e Kuvendit nuk e lejon, atëherë për çfarë po na ftoni të diskutojmë apo dialogojmë? Për një amendament që nuk ndryshon?
Ky qëndrim dhe qëndrimi juaj zyrtar sot në Këshill, dëshmon se ju nuk jeni të hapur për diskutime, ndërkohë që Opozita kërkon që diskutimi të jetë transparent dhe gjithëpërfshirës, duke hequr dorë nga FAKTI I KRYER. Teoria e “faktit të kryer” shkon kundër parimeve të dialogut politik, që nuk është dhe nuk mund të jetë kurrë fasadë.
Kjo është arsye që ne kërkuam që nëse ju keni një çështje që lidhet me zgjedhjet për diskutim, atë duhet ta sillni në Këshillin Politik, për t’u përfshirë të gjithë bashkë në një proces transparent dhe gjithëpërfshirës, që lejon një produkt të përbashkët dhe konsensual, dhe jo një produkt që është paracaktuar nga ana juaj dhe ku Opozita politike e vendit është e përjashtuar. Nëse produkti është i paracaktuar në mënyrë të njëanshme dhe është i pandryshueshëm siç ju shpreheni, atëherë ju ribëj me dije se po shkelni Marrëveshjen e 14 Janarit dhe 5 Qershorit, sepse po kryeni ndryshime thelbësore në legjislacionin zgjedhor pa pyetur, diskutuar dhe marrë mendimin dhe konsensusin e Opozitës politike të vendit, duke zhbërë produktin e përbashkët të 5 Qershorit.
Gjithësesi, në vijim edhe të deklarimit tuaj të pavëretë sot në media, kërkojmë mbledhjen e Këshillit Politik nesër, ora 17:00, për të vijuar dialogun, për çdo çështje, por pa cenuar marrëveshjen e 5 Qershorit.
Mbetem në pritje të konfirmimit tuaj!
Oerd Bylykbashi
Petrit Vasili
