Opozita jashtëparlamentare duket se ka nisur përgatitjet për një platformë të plotë për reformën zgjedhore.
Platforma e opozitës ka nisur procesin e krijimit fill pas takimit të zhvilluar më 18 shtator në selinë blu, ku të pranishëm ishin të gjithë anëtarët e koalicionit opozitar.
Mësohet se platforma parashikon krijimin e një tryeze ekzekutive në nivel Sekretari të Përgjithshëm ose nënkryetarësh drejtuar nga Partia Demokratike, e cila për detyrë do të ketë të përgatisë agjendën e veprimit të opozitës, por dhe të diskutojë apo miratojë nisma të ndryshme.
Nga PD bëhet me dije se ka punuar ish-deputeti Oerd Byltkbashi, cili është dhe njohës i mirë i çështjeve zgjedhore.
Ndërkohë, në platformë thuhet se partitë e koalicionit duhet të paraqesin brenda 28 shtator opsionet për Reformën Zgjedhore, deri në përcaktimin e një qëndrimi të përbashkët.
Platforma gjithashtu parashikon takime të përjavshme me forcat opozitare në nivel kryetarësh, me qëllim institucionalizimi i vendimmarrjes për çështje dhe aksionet e ndryshme.
Në kuadër të reformës zgjedhore, opozita jashtëparlamentare ka parashikuar edhe ngritjen e disa grupeve të përbashkëta pune si ai për marrëdhëniet ndërkombëtare.
Ky grup pune ka për qëllim ndër të tjera të përgatisë materialin ku të përfshihen; raporti i ODHIR, raporti i Departamentit Amerikan për krimin dhe trafiqet, raporte të tjera, si dhe qëndrime të mediave ndërkombëtare, ku sugjerohen zgjidhje dhe qëndrime të opozitës, për çështje të ndryshme përfshirë zgjedhjet e lira apo kriminalitetin.
Ky grup pune ka si objektiv identifikimin e të gjitha marrëdhënieve politike dhe personale ndërkombëtare dhe përcaktimi i koordinatorëve në çdo shtet, kjo në përpjekje për të forcuar bashkëpunimin dhe rritur mbështetjen.
Opozita gjithashtu do të ketë një grup të përbashkët pune edhe për rininë dhe marrëdhënien me median.
Opozita, në kuadër të kësaj platforme, do ngrejë edhe Senatit të Opozitës, i cili ka për qëllim ribashkimin dhe afrimin e figurave politike, të cilat kanë kontribuar ndër vite.
Për Senatit të Opozitës, thuhet në platformë se një nga pikat e rëndësishme është afrimi i intelektualëve në emër të bashkëqeverisjes./ Opinion.al E.Xh.
