Kreu i grupit parlamentar të PS-së, Bledi Çuçi, në një dalje për mediat komentoi situatën e ndodhur sot në Kuvend, ku disa deputetë demokratë bllokuan sallën dhe nuk lejuan nisjen e seancës.
Çuçi tha se shfaqja e opozitës sot ishte e shëmtuar dhe se nuk justifikohet dhuna ndaj institucioneve.
“Sot ishte një shfaqje e shëmtuar në Kuvend. Asgjë nuk e justifikon dhunën ndaj institucionit. Ne nuk kemi rrëzuar asgjë. Ka një vendim për një komision bipartizan dhe ta themi qartë dhe për shqiptarët. Vendimi për ngritjen e komisioneve e thotë qartë, një bashkëkryetar nga PS dhe një nga opozita. Janë kushtet që të fillojmë për reformën. Ka kërkuar kryetari i grupit parlamentar të PD dhe nuk ka pritur vendimin tonë. Pa marrë akoma përgjigje, si mund të kërkohet”, tha ai.
