Kreu i Komisionit Hetimor parlamentar për zgjedhjet e 25 Prillit Enkelejd Alibeaj ka njoftuar se mbledhja e ardhshme e komisionit do të jetë të premtën e 22 tetorit.
Opozita ka akuzuar Partinë Socialiste se e ka bojkotuar mbledhjen si njjë strategji për të penguar veprimtarinë e komisionit, ndërkohë që përmes një njoftimi, kuvendi bëri me dije se mbledhja e sotme u anulua për shkak të mungesës së kuorumit të nevojshëm.
“Ju njoftojmë se mbledhja e sotme e komisionit hetimor parlamentar “Për kontrollin e veprimtarisë së organeve të administratës publike dhe pushtetit vendor, për të verifikuar përdorimin e burimeve të administratës shtetërore për qëllime elektorale në zgjedhjet e 25 prillit 2021” nuk u zhvillua për shkak të mungesës së kourumit të nevojshëm. Kryetari i këtij komisioni z.Enkelejd Alibeaj ngarkoi Sekretariatin Teknik të këtij komisioni të njoftojë anëtarët se mbledhja e ardhshme e komisionit hetimor do të zhvillohet më datën 22 tetor 2021, ora 10:00”, thuhet në njoftim.
Më herët edhe deputeti Gazmend Bardhi akuzoi Partinë Socialiste për bojkot të qëllimshëm të komisionit./Opinion.al
