Të martën, në emisionin “Opinion” u trajtua tema “Si tentuan ta vrasin Trump?”.
Në studio u tregua me skema edhe atentati i parë ndaj tij. Po ashtu u fol edhe për raportet e Trump me kundërshtaren Kamala Harris. Në fokus edhe sondazhet si vlerësohet deri më tani gara për president. Në lidhje me këtë çështje Blendi Fevziu kishte dy të ftuar në studio, gazetaren Rosalba Bejdo dhe analistin Fitim Zekthin. Në lidhje të drejtpërdrejtë nga Uashingtoni, gazetarja Menada Zaimi dhe nga Amani, Drejtori Ekzekutiv i Qendrës Amerikane për Luftimin e Ekstremizmit dhe Terrorizmit, Aranit Shehu.
Para se të nis diskutimi me trajtimin e temës, në studion e “Opinion” u fol për pamjet e publikuara nga Klan News, teksa një grua tentoi të rrëmbejë një fëmijë 2-vjeçar në një supermarket në Tiranë.
Gazetari Besar Bajraktaraj tha këtë të martë gjatë emisionit “Opinion” në Tv Klan se vetëm gjatë ditës së sotme është bërë i mundur identifikimi i gruas. Bëhet fjalë për një grua rreth të 50-ave dhe që dyshohet se ka probleme të shëndetit mendor.
Në pjesën e tretë, në studion e “Opinion”, ministrja e Arsimit dhe Sportit Ogerta Manastirliu ka folur rreth skandalit me diplomat false të Kolegjit “Wisdom” në Itali. Në një intervistë për Blendi Fevziun, ministrja theksoi se ka pasur një grup pune kontrolli të këtij insititucioni arsimor që nga viti 2019 dhe janë konstatuar një sërë shkeljesh./Opinion.al
