Të mërkurën, më 22 maj 2024 në emisionin “Opinion” është trajtuar tema “Pro dhe kundër martesave të të njëjtit seks!”
Martesat brenda së njëjtës gjini për disa vende janë të rralla por për disa të tjera janë të papranueshme. Alba Ahmetaj dhe Edlira Mara para disa ditësh kurorëzuan në tarracën e Bashkisë së Tiranës dashurinë e tyre prej 14 vitesh.
Duke qenë se në shtetin tonë martesa brenda së njëjtës gjini është e paligjshme kjo pasoi debate dhe reagime të shumta nga komunitetet fetare. Martesa e dy vajzave shqiptare tërhoqi vëmendjen e opinionit publik në vendin tonë por jo vetëm. Shumë agjenci prestigjioze mediatike iu kushtuan artikuj dhe reportazhe të shumta martesës të cilësuar si të pazakontë në shoqërinë tonë.
Të ftuar në emisionin e mbrëmshëm ishin: Alba Ahmetaj, Edlira Mara, Suela Koçibellinj, Altin Hazizaj, Ledina Halilaj, Dom Mark Pashkja.
Në pjesën e fundit emisioni “Opinion” ishte te Coca-Cola e cila festoi 30-vjetorin në Shqipëri.
Coca-Cola ishte e para kompani ndërkombëtare në Shqipërinë post komuniste, Coca-Cola ishte në fakt edhe pija e ndaluar apo e panjohur e një sistemi ku ndikimet e huaja ishin një tabu. Në një ceremoni ku morën pjesë përfaqësues të biznesit, shoqërisë civile, por dhe politikës shqiptare, u vu ndër të tjera theksi edhe në rritjen që kompania ka pasur ndër vite. Po ashtu edhe në nismat e saj novatore./Opinion.al
