Në emisionin “Opinion” të së enjtes, 5 tetor 2023, është trajtuar tema “Përse po përplasen Rama dhe Kurti?” .
Marrëdhëniet mes Shqipërisë dhe Kosovës, në marrëdhëniet zyrtare politike, jo mes shqiptarëve të Kosovës dhe shqiptarëve të Shqipërisë, janë më të këqija se sa kurrë në 24 vitet e fundit që nga çlirimi i Kosovës në vitin 1999. Edhe nëse shkojmë tutje në raportin mes dy vendeve pas rrëzimit të komunizmit pra, pas vitit 1990, sërish rekordet e fundit regjistrojnë marrëdhëniet më të këqija që Shqipëria dhe Kosova zyrtare, pra Prishtina dhe Tirana zyrtare kanë pasur midis tyre. Më shumë se sa një ftohje që vjen nga nivelet e ndryshme të shoqërisë së dy vendeve është një ftohje e drejtpërdrejtë e dy liderëve kryesorë, kryeministrit të Shqipërisë, Edi Rama dhe kryeministrit të Kosovës, Albin Kurti.
Në studion e emisionit “Opinion” gazetari Blendi Fevziu kishte një panel prej 6 personash për të folur për këtë çështje: Fitim Zekthi, analist/pedagog; Redi Shehu, analist; Julian Zyla, analist; Mirela Milori, Gazetare Klan Neës; Gazmir Raci-analist, dhe Preç Zogaj, analist. Në lidhje live nga Prishtina gazetarja Blerta Dalloshi Berisha.
Kjo temë është trajtuar në pjesën e parë dhe të dytë të “Opinion” për rreth një orë e 30 minuta.
Por para se të kalohej tek Kosova u fol për lajmin tragjik ku humbi jetën një fëmijë 3-vjeçar pas një operacioni në një klinikë dentare. Për këtë rast dhe detaje gazetarja e Klan Neës, Glidona Daci.
Në pjesën e tretë të “Opinion”, është transmetuar një material interesant, mbi “Laser Way” klinikën e parë në Shqipëri për mbjelljen e flokëve.
