Të mërkurën, më 24 prill 2024 në emision u trajtua tema “ Opinion në krahinën më të izoluar në Shqipëri!”
Ky emision në “Opinion” ishte një ecje nëpër zonat kryesore të Mirditës. Nëpër historinë e saj problematike, por edhe të lavdishme.
Është ndoshta sot një prej zonave në Shqipëri ku fshatrat nuk kanë komunikim. Lëvizja në këto territore është shumë e vështirë. Në studio për ta pasqyruar më saktë këtë zonë ishte edhe Dom Gjergj Meta.
Një prej historive më të dhimbshme të komunizmit nis në vitin 1967, kur u vendos që në Spaç të Mirditës të instalohej kampi ose “Reparti 303” i të burgosurve. Ishte i konceptuar si kamp pune të detyruar për minierën. Në 23 vite ekzistencë pati më shumë se sa 1 mijë të burgosur, pjesa më e madhe tyre të burgosur politikë.
“Opinion” ishte në kampin e Spaçit ku na tregoi me sytë e atyre që e kanë përjetuar mbi kurriz dhunën, represionin dhe shenjat që diktatura la mbi shqiptarët. Zenel Drangu dhe Angjelin Dabërdaku na rrëfyen të kaluarën e tyre në Spaç./Opinion.al
