Të hënën 26 shkurt 2024 në emisionin “Opinion” u trajtua tema “Fëmijët vrasin babain, mister motivi!”.
Një ngjarje tronditëse ka ngritur një sërë pikëpyetjesh që është shumë e vështirë t’i japësh përgjigje, vetëm nga ana policore, vetëm nga ana e gazetarisë investigative, vetëm nga ana e investigimit apo dhe ajo e analizës psikologjike të ngjarjes.
Në 13 Shkurt 2024, një familje denoncoi humbjen e kryefamiljarit, bashkëshortit dhe babait. Bëhet fjalë për Pëllumb Metën, i cili u deklarua i zhdukur. Policia e Shtetit nisi hetimin. Në fakt, aq sa do ta shohim ne nga hetimi, duket që detajet janë shumë të thjeshta në kuptimin e parë që nuk ishte thjesht një zhdukje por diçka më e komplikuar.
Pas një pune 10-ditore, policia arriti të zbardhë të gjithë rastin e vrasjes. Bëhet fjalë për një baba i cili është vrarë nga fëmijët e tij, pretendohet që vrasësi është djali. Në fillim ishte vajza që e mori përsipër vrasjen, më pas ishte djali që deklaroi që ishte ai vrasës, u rikthye prapë sot gjatë seancës gjyqësore vajza për të marrë përgjegjësinë për vrasjen. Përtej kësaj, një pikëpyetje e madhe është se çfarë ka ndodhur realisht. Në cilat rrethana ka ndodhur vrasja? Bëhet fjalë për një familje ku babai ka qenë tejet autoritar dhe babai ka ushtruar dhunë apo është një histori më e komplikuar? Ajo që bën përshtypje deri tani është fakti që vrasja është kryer në gjakftohtësi të plotë dhe është një vrasje e planifikuar.
Të ftuar në studio për të folur për këtë temë kanë qenë: Skënder Hita, Lutfie Muka, Lenida Halilaj, Elisabeta Imeraj, Spartak Koka, Merin Maçi, Suela Koçibellinj.
Ndërsa në pjesën e tretë është transmetuar një intervistë me balerinën Klaudia Pepa e shoqeruar nga një prej koreografëve më të mëdhenj të botës Daniel Ezralov.
