Të hënën në emisionin “Opinion” ishte rikthimi në qendër të vëmendjes të njërës prej këngëtareve më të njohura të viteve ’80, Parashqevi Simakut. Shumë prej atyre që kanë lindur ndoshta në vitet ’90 e njohin përmes imazheve të këngëve në Youtube, disa kasetave që kanë qarkulluar në fillim të viteve ’90 apo në skenat e festivalit.
Ishte një lloj meteori që doli përnjëherë në skenën e festivalit, në 7 prej tyre mori 2 çmime të para dhe u kthye në një personazh të imituar nga të gjithë. Jeta e Parashqevi Simakut nuk ishte aspak e lehtë. Ajo u largua nga Shqipëria në vitin 1991 dhe u vendos në SHBA. Të mërkurën e shkuar, tri burime dërguan drejt Blendi Fevziut një kronikë të “ABC7” të Nju-Jorkut, ku tregohej sesi shumë familje përgatisnin çanta shpine për personat e pastrehë. Në të dukej një grua shumë e ngjashme me Parashqevi Simakun, të cilën gazetari Blendi Fevziu e publikoi në rrjetet e tij sociale duke kërkuar informacione. Prej këtij publikimi, u konfirmua identiteti i saj e më tej, pati edhe njerëz që kanë shkuar për ta takuar e ndihmuar.
Të ftuar: Elvira Tata, Zhani Ciko, Ani Simaku, Fisnik Qosja
Në pjesën tjetër të emisionit “Opinion” ishte hedhja e shortit të eleminatoreve të Kampionatit Botëror ku Shqipëria rikthehet në një grup problematik, nisur nga historia sesa nga konkurrenca sportive. Shqipëria do të jetë në një grup me Anglinë, një prej ekipeve më të forta të kontinentit, me Serbinë, ndeshje me të cilën në vitet 2014 dhe 2015 kanë ngjallur një debat mjaft të gjerë që i ka tejkaluar thjesht konturin e një debati sportiv, me Letoninë dhe Andorrën, dy ekipe më modeste në krahasim me Shqipërinë. Më shumë sesa shorti, ndeshja Shqipëri-Serbi rikthen historinë e 10 viteve më parë.
Të ftuar: Alban Xhihani, Vilma Masha, Erjon Xhafa, Ervin Bulku, Ivan Gvozdenoviç, Qeqa Krelani
