Të enjten në mbrëmje, në emisionin “Opinion” u diskutua rreth akuzave të Arben Ahmetajt për Qeverinë.
Disa ditë më parë, ish-kryeministri Arben Ahmtaj ka dhënë një intervistë të gjatë për “Syri Tv” ku ka hedhur akuza ndaj mazhorancës. Arben Ahmetaj është në kërkim nga SPAK dhe kërkohet për deklarim të rremë të pasurisë, fshehje të pasurisë dhe vepra të tjera. Ai ka vendosur të qëndrojë në Zvicër ku ka aplikuar për azil politik. Kjo intervistë kishte tre shënjestra kryesore: kryeminstrin Rama, zëvendëskryeministren Belinda Balluku dhe kreun e SPAK. Dy të parët duke folur drejtpërdrejt si bashkëpunëtor i tyre, duke deklaruar çfarë kishin bërë ndërsa personin e tretë, duke i hedhur dorashkën e sfidë për t’i treguar se ajo që SPAK-u ka bërë me të duket se nuk e bën dot me të tjerët. Arben Ahmetaj nuk pranon asnjë fajësi për veten, nuk është një rrëfim dhe pendesë ku mund ta quante veten bashkëpunëtor, por deklaron se ka qenë brenda një kurthi dhe ka respektuar ligjin, ndërsa të tjerët kanë abuzuar. Çfarë po sjellin në Partinë Socialiste këto akuza të Ahmetajt? Si shpjegohet që disa nga krerët kryesorë të Partisë Socialiste janë përfshirë në një debat mes tyre? Tre figurat kryesore të PS, ku në pjesën informale ka diskutime të mëdha se janë duke luftuar midis njëri-tjetrit (Arben Ahmetaj, Erion Veliaj dhe Belinda Balluku). Duket e gjitha një lloj intrige e brendshme brenda PS në përmasa shumë herë më të mëdha se ç’është parë në 30 vjet.
Në pjesën e tretë të emisionit: Historitë e së enjtes/ Manastiri i La Trappe në Hollandë. Një prej 10 manastireve trapiste në botë. Është një manastir shumë i rrallë sepse ai ka filluar të funksionojë në vitin 1881 pasi këta murgj benediktianë u larguan nga Franca për mosmarrëveshje me shtetin dhe u vendosën në Hollandë, në një nga pronat e mbretit që ua dha në përdorim. Për të ekzistuar dhe për të pasur një formë bamirësie, ata vendosën që të prodhojnë një birrë artizanale që konsdierohet një nga më të rrallat në botë. Formulën e saj e mbajnë në një kuti të fshehtë, çelësi i së cilës mbahet nga një murg. Ata prodhojnë edhe një nga birrat më të shtrenjta në botë, një shishe e së cilës shkon 800-900 euro që vjetërohet në fuçi konjaku, rumi apo porto për 5 vjet. Është një birrë që prodhohet vetëm nga këta murgj. Së fundmi, administrohet nga një tjetër kompani me histori të rrallë, “Bavaria” e cila i takon një familjeje që në vitin 1719 ka filluar prodhimin e birrës në Hollandë dhe prej 306 vjetësh vijon të prodhojë birrë duke qenë e pranishme në 150 shtete të botës, me mbi 3000 punonjës.
