Policia e Shtetit ka zhvilluar një operacion të madh në disa qytete të vendit, ndërsa janë lëshuar 15 urdhër arreste.
Mësohet se janë zbardhur 6 vrasje dhe 5 tentativa për vrasje me eksploziv. Operacioni është zhvilluar pas rrëfimit të n jë personi të arrestuar, i cili ka bashkëpunuar me drejtësinë.
Sipas informacioneve, personi që ka bashkëpunuar me drejtësinë është Artan Tafani, i arrestuar pak ditë më parë nga Policia e Lushnjes pasi ishte shpallur në kërkim për grabitjen e një exchange në zonën e Astirit në Tiranë
Nga rrëfimi i Tafanit, i cili është kthyer në bashkëpunëtor të drejtësisë janë zbardhur 6 vrasje, 2 në Greqi, në Tiranë, Elbasan dhe Berat.
Operacioni ka vijuar që prej mesditës së sotme, shtrirë në disa qytete të vendit. Në mesin e personave që ka përmendur Tafani si autorë vrasjesh janë edhe emra të njohur të botës së krimit.
Që prej identifikimit policia ka pasur dyshime të përfshirjes së Tafanit në aktivitet të theksuar kriminal, pjesë e një grupi me bazë në disa qytete.
Është mbajtur në vëzhgim për disa kohë dhe më pas është ndërhyrë për arrestim në Lushnje. Kapja e tij është mbajtur sekret për shkak të hetimeve dhe rrëfimeve që po bënte për ngjarjet kriminale.
Këtë të mërkurë i është komunikuar masë në Tiranë dhe në vijim pritet t’i komunikohen brenda vendit edhe 2 masa të tjera.
