Prokurori i posaçëm, Alfred Shehu, bëri me dije se SPAK kërkoi 11 masa sigurimi arrest me burg, të cilat janë pranuar nga Gjykata e Posaçme Kundër Korrupsionit dhe Krimit të Organizuar.
Shehu bëri me dije se nga masat e sigurimit, janë ekzekutuar për nëntë persona, ndërsa dy të tjerë vijojnë në kërkim.
Gjatë zbatimit të masave të sigurimit janë sekuestruar tetë automjete, telefona celularë dhe shumë dokumenteve ku një pjesë e konsiderueshme e tyre konsiderohen me vlerë për hetimin dhe ka të dhëna për komunikimin kriminal të vetë personave nën hetim.
“Janë zbuluar dhe kapur sasi lënde narkotike edhe gjatë vitit 2024. Nga ana e SPAK është dërguar në maj kërkesa për caktimin e masës së sigurimit për 11 persona dhe nga GJKKO është pranuar kërkesa e SPAK duke caktuar masën e sigurisë arrest me burg për 11 persona. U caktua që operacioni të kryhej në orët e para të mëngjesit të sotëm, kanë marrë pjesë edhe përfaqësues të policisë finlandeze. Si rezultat u ndaluan 9 persona dhe vazhdon puna për të bërë të mundur arrestimin e dy personave të tjerë.
Gjatë zbatimit të masave të sigurimit u sekuestruan 8 automjete, telefona celularë dhe shumë dokumente, ku një pjesë e konsiderueshme e tyre janë me vlerë për hetimin sepse ka të dhëna në gjuhën finlandeze në lidhje me aktivitetin kriminal të personave”, u shpreh Shehu.
Ai shtoi se hetimi ka filluar mbi bazën e informacioneve e ardhura nga autoritetet finlandeze.
“Është vlerësuar ky informacion dhe në qershor 2023 është regjistruar procedimi penal, për vepra penale të kryer në kuadër të krimit të organizuar për prodhim, shitje, shpërndarje, magazinim, fakte që ishin konstatuar në Finlandë”, tha Shehu.
Prokurori pohoi se hetimi deri më sot ka qenë “krejt i fshehtë”, jo i hapur menjëherë pas krijimit të skuadrës së përbashkët hetimore.
“Janë përdorur metoda speciale të hetimit duke filluar nga përgjimet dhe gjithashtu është në vazhdimësi veprimtaria e personave, duke qenë se veprimtaria e tyre vazhdonte në Finlandë edhe pas krijimit të skuadrës së përbashkët hetimore”, tha Shehu.
Sipas prokurorit, aty janë shkëmbyer informacione në vijimësi, gjë që ka sjellë edhe zbulimin dhe kapjen të sasive të tjera lëndës narkotike edhe gjatë vitit 2024.
“Shkëmbimi i informacionit ka qenë i pandërprerë me autoritetet finlandeze. Në përfundim të këtyre veprimeve u arrit dhe përcaktimi i ditës së aksionit se kur do bëhej goditja, dhe kjo është në marrëveshje të përbashkët me drejtuesit e autoriteteve finlandeze”, u shpreh prokurori.
Ndërsa prokurori Arben Kraja, i cili ka hetuar po ashtu dosjen në fjalë, tha se hetimi ka nxjerrë disa problematika që tregojnë shtrirjen dhe shpërndarjen e aktivitetit kriminal jashtë territorit të Shqipërisë.
