Të tjera detaje janë bërë të ditura lidhur me operacionin e SPAK, ku ra në pranga ish-drejtori i policisë së Tiranës, Erzen Breçani. Ky i fundit akuzohet për pastrim parash dhe përkrahje të autorit të krimit.
Në kërkim është shpallur Ervin Mata, i cili dyshohet se gjendet jashtë vendit. Mata dyshohet për grup të strukturuar kriminal, trafik narkotikësh dhe kryerje e veprimeve nga organizata kriminale.
Po ashtu masë sigurie është vendosur edhe për Ismail Zenelin që veç akuzave që ka Mata, ka gjithashtu edhe veprën e sigurimit të kushteve për të kryer vrasje.
Bujar Ajeti, nga Kukësi akuzohet për krijim kushtesh për vrasje. Mësohet se Ajeti ka pasur mbiemrin Germizi, ndërsa dyshohet se po planifikonte të vriste dy vëllezër në Britaninë e Madhe. Ai është një ndër emrat më të njohur të krimit në Kukës.
Germizi në 1999 është i dyshuar për grabitjen bankës së kursimeve në Kukës, në atë kohe ai ka qenë oficer policie, në 2009 është dyshuar për trafik armësh dhe në Maqedoninë e Veriut është arrestuar për trafik droge. Ai është arratisur nga burgu në Maqedoninë e Veriut dhe kishte humbur gjurmët.
Ndërsa tani ka dalë sërish në “sky ecc” nga komunikimet rezulton i përfshire në trafik droge jashtë vendit.
Ndërkohë që Dedian Gjoni, shef i krimeve në Kombinat, i cili është nga Lezha dyshohet të ketë siguruar kushtet për të kryer një vrasje në bashkëpunim me grupin kriminal.
Në pranga ka rënë djali i Erzen Breçanit, që dyshohet për trafik ndërkombëtar droge dhe pastrim parash.
Në listë janë edhe Besmir Murati , Artan Sulejmani , Albert Prenga dhe Bajram Grabova, të dyshuar për trafik kokaine. Këto të 4 dyshohet se janë në Spanjë, prandaj operacioni po vijon edhe atje. Grupi trafikonte kokainë nga Ekuadori dhe Kolumbia drejt vendeve të Bashkimit Europian.
Jonida Babameto është arrestuar për kohën kur ishte oficere në Interpol, dhe ka dyshime se përcille informacione tek grupi.
