Drafti për Reformën në Drejtësi ka hyrë në kalendarin 3-javor të punimeve të Kuvendit 13 qershor – 1 korrik. Vendimi është publikuar në faqen zyrtare të Kuvendit të Shqipërisë, ku bëhet me dije se kalendari trijavor u miratua me konsensus në konferencën e kryetarëve.
Menjëherë pas publikimit, Edi Paloka i PD-së e denoncoi këtë publikim. Sipas tij, PD-ja nuk është vënë fare në dijeni që reforma në drejtësi ka qenë në kalendarin e punimeve 3 javore, pasi në draftin që u është ofruar përfaqësueseve të opozitës para mbledhjes së konferencës së kryetarëve, nuk përfshihej fare reforma në drejtësi, ndërsa në draftin publikuar në faqen kuvendit, ku thuhet ‘i miratuar me konsensus të plotë’, gjendet edhe reforma në drejtësi.
Sesi do të zgjidhet ky ngërç, mbetet të shihet, por tani nuk duket se bëhet më fjalë për miratim të reformës me konsensusin e PD-së. Ambasada amerikane dhe ajo e BE-së kanë deklaruar hapur se inkurajojnë miratimin e draftit brenda qershorit, qoftë edhe me 94 vota (2/3 e deputetëve). PD-ja mund të bojkotojë votimin e reformës (me të drejtë, nëse gjërat janë siç thotë Paloka), por për miratimin e saj, duhet që vetëm disa deputetë të partive të tjera opozitare të shkojnë e ta votojnë atë. Ndërkohë duhet t’u merret vota edhe disa deputetëve rebelë të mazhorancës, të cilët ose kanë probleme me drejtësinë ose me partinë.
Në ditët në vijim pritet të fillojë një operacion intensiv për garantimin e 94 votave kaq shumë të kërkuara nga Rama, Lu dhe Vlahutin. Në qoftë se një ditë do të xhirohet një film për këtë operacion, regjizori mund të përdorë si model filmin Lincoln të Steven Spielberg-ut, fituesit të çmimit Oscar më 2012.
Në atë film biografik, tregohet sesi Presidenti Lincoln arriti të bindëte mjaftueshëm kongresmenë për të miratuar Amendamentin e 13-të të kushtetutës amerikane, i cili do të siguronte lirinë e skllevërve zezakë. Jo të gjithë Republikanët ishin në shportën e Po-së dhe, për më tepër, edhe nëse të gjithë Republikanët do ta mbështesnin Presidentin Lincoln, duheshin edhe disa vota të Demokratëve. Presidenti përdori të gjitha mjetet e MUNDSHME për miratimin e Amendamentit 13, duke e siguruar atë me 2 vota më tepër se sa duheshin.
“Nuk ka sfidë legjislative që s’tejkalohet, kur themelet e lirisë janë në balancë,” tha Presidenti Lincoln pas miratimit.
