Një operacion droge është zhvilluar nga policia shqiptare dhe ajo italiane. Operacioni i koduar “Boaster” ka nisur në orën 06:00 të mëngjesit të sotëm në Shqipëri dhe Itali dhe janë arrestuar 22 persona, 2 prej tyre në Shqipëri.
“Në operacion janë përfshirë strukturat, Drejtoria për Hetimin e Narkotikëve dhe Trafiqeve, ZQK Interpol Tirana, D.V.P. Durrës, Tiranë dhe Elbasan. Janë arrestuar gjithsej 22 persona si pjesë e një organizate kriminale që merrej me trafikimin e lëndëve narkotike me shtrirje në vendin tonë dhe në vendet e BE-së. Nga 22 shtetasit e arrestuar, 2 prej tyre janë arrestuar në vendin tonë në orët e para të mëngjesit”, njoftoi policia.
Të arrestuarit në Shqipër janë:
1-Enea(Eldi) MILLA (DOMA), 32 vjeç, lindur në Tiranë,
2-Adriatik ALSHABANI, 29 vjeç, lindur në Durrës.
Mediat italiane: Në javë trafikonin 50 kg heroinë
Ndërkohë sot në mëngjes mediat italiane raportuan për këtë operacion, ku mes të arrestuarve kishte shqiptarë, tuniziane dhe rumunë.
Sipas policisë italiane që prej nëntorit të 2014 deri në tetorin e 2015 personat e arrestuar kanë trafikuar sasi të mëdha heroine, kryesisht për rajonet e veriut të Italisë.
Kjo organizatë kriminale trafikonte në javë 50 kg heroinë.
Operacioni vijon ende dhe në përfundim të tij do t’ju bëjmë me dije edhe emrat e të arrestuarve në Itali.
