Gjatë një operacioni të zhvilluar mëngjesin e sotëm në provincat e Kietit, Gjenovës, Kampobasos dhe Foxhias, policia italiane ka goditur një bandë shqiptarësh.
Lajmi bëhet i ditur nga “Rai News” që shkruan se 20 persona përfunduan në pranga. Urdhër-arrestet janë lëshuar nga Prokuroria e L’Akuilës, me kërkesë të Antimafias. Idenditeti i tyre nuk bëhet i ditur.
20 të arrestuarit akuzohen për pjesëmarrje në një organizatë të trafikut të drogës si dhe për posedim armësh dhe droge. Gjatë operacionit, të quajtur “Evelin” agjentët kanë zbatuar 37 dekrete për bastisje ndaj personave të përfshirë në hetime.
Në këto kontrolle, policia sekuestroi armë dhe 12 kilogramë lëndë narkotike.
Sipas mediave italiane, grupi kriminal merrej kryesisht me menaxhimin e drogës që vinte nga Shqipëria.
