Hetimet e nisura prej më shumë se dy vitesh nga policia italiane dhe ajo shqiptare janë finalizuar sot me arrestimin e 16 personave, 14 në Itali dhe 2 në Shqipëri.
Operacioni “Rivera”, i zhvilluar në të njëjtën kohë në Itali e Shqipëri, kishte si qëllim goditjen e një grupi të organizuar kriminal, të përbërë kryesisht nga shtetas shqiptarë, me aktivitet trafikimin e narkotikëve në rajonin Emilia Romagna, Itali.
Policia njofton se në zbatim të urdhër-arresteve të lëshuara nga zyra e Prokurorisë Antimafia në Bolonja dhe si rezultat i veprimeve policore të mirëkoordinuara mes palëve, u arrestuan në vendin tonë, me qellim ekstradimi drejt Italisë, shtetasit shqiptar E. H., 40 vjeç dhe J. D. (M.), 28 vjeç.
Vazhdojnë veprimet hetimore për dokumentimin e plotë të veprimtarisë së paligjshme të këtij grupi të strukturuar kriminal. /Opinion.al
