Këtë të premte Olsi Rama, vëllai i kryeministrit, Edi Rama, është paraqitur sërish në SPAK.
Pasi qendroi për rreth një orë në ambientet e SPAK, Olsi Rama deklaroi se sqarimet e nevojshme për çështjen “Xibraka” i ka dhënë para prokurorëve.
“Isha në SPAK si person në dijeni, shpjegimet e mia i dhashë aty brenda”, deklaroi ai.
Vëllai i kryeministrit tha se është thirr nga SPAK si person që ka dijeni për çështjen “Xibraka”.
Herën e fundit që vëllai i kryeministrit u paraqit pranë Prokurorisë së Posaçme ishte 28 qershori i këtij viti. Ai mohoi çdo lidhje me bosët e dosjes “Xibraka”, ndërsa dha një shpjegim për përdorimin e një automjeti për të cilin është akuzuar publikisht nga Gazment Bardhi.
Vizita e Olsi Ramës në SPAK u pasua me një vorbull reagimesh e kundëreagimesh publike. I pari ishte deputeti Bardhi, që tha se Olsi Rama konfirmoi denoncimet e bëra prej tij duke pasuar me reagimin e kryeministrit Edi Rama, i cili e cilëson Bardhin një shpifës.
