Në një intervistë të dhënë pak minuta më parë në emisionin “Opinion”, gazetari i cili realizoi audiopërgjimin mes vëllait të ministrit të Brendshëm, Fatmir Xhafajt, Jetmir Olldashi, i pyetur rreth këtij përgjimi është shprehur ndër të tjera, se nuk ka qenë prezent kur “babalja”, dëshmitari Albert Veliu, ka takuar Agron Xhafajn.
“Unë nuk e pashë kur Babalja e takoi Agron Xhafajn sepse edhe pozicioni i lokalit është i tillë që nuk e sheh dot. Aty Babalja qëndroi pesë minuta. Unë i kisha dhënë stilolapsin përgjues dhe kur u kthye te unë ma dha”, u shpreh ai sot në “Opinion”.
Autenticiteti i përgjimit është në fakt pika më e fortë e debatit nëse personi tjetër që flet me Babalen është apo jo Agron Xhafaj dhe vetë gazetari qartësisht nuk del garant në lidhje me këtë moment të investigimit.
Fevziu: Si e vërtetuat ju autencitetin e regjistrimit që bëhej fjalë për Agron Xhafën dhe ndoshta jo për një tjetër?
Olldashi: Jo unë nuk e kam vërtetuar autencitetin e videopërgjimit.
