Pas humbjes me penallti në finalen e kampionatit të futbollit në Lojërat Olimpike “Rio 2016” me Brazilin, gjermani Robert Bauer “ngacmoi” tifozët vendas me gjestin më provokues të mundshëm, duke ngritur lart shtatë gishta. Domethënia dihet: është rezultati i gjysmëfinales së Botërorit 2014, kur Gjermania shkatërroi në “shtatë copa” skuadrën “Seleçao” duke e mposhtur me rezultatin 7-1. Padyshim që populli brazilian nuk e harron dot disfatën e tyre më të madhe në histori.
A është Bauer një humbës i keq? Kjo është pyetja që ngre sot gazeta gjermane “Bild” për lojtarin e Ingolstadtit, i cili – fatmirësisht – u pendua për veprimin e tij pak orë më pas. “Gjesti i shtatë gishtave ishte prej emocioneve. Kam menduar pak për këtë, por ja që ndodhi. Në fund e kuptova se ishte një veprim idiot dhe kërkoj ndjesë për këtë”, – u shpreh mbrojtësi i krahut. Bauer shtoi: “Në ‘Instagram’ dhe ‘Facebook’, unë i kam kuptuar gjërat drejt dhe jam përpiqur t’i kthej gjërat si duhet. Nuk doja të lëndoja njeri. Jam shumë mirënjohës që m’u dha mundësia të jem këtu dhe të kem një përvojë në këtë vend. Ishte hera ime e parë në Brazil”.
Meqë ra fjala, shkruan “Bild”, Bauer mund të ndryshojë skuadër pas rikthimit të tij në Gjermani. Jo, kjo nuk ka lidhje me gjestin e tij në Rio, por me marrëveshjen që ai ka me Werder Bremenin. Kontrata aktuale e 21-vjeçarit në Ingolstadt përfundon në vitin 2018, por – siç zbuloi ai vetë – “klubet janë në proces bisedimesh”. Vlera e tij në treg llogaritet rreth 3-4 milionë euro.
