Gjykata e Krimeve të Rënda la në arrest shtëpie inspektorin e SHISH, Florian Bushi. Ai u arrestua një ditë më parë pasi dyshohet se kishte lidhje dhe i jepte informacion, personit te arrestuar si autori i dyshuar i vrasjes në Mbrostar të Fierit, Ilir Memushaj.
Seanca gjyqësore u zhvillua me dyer të mbyllura nga gjyqtari i vetëm Dritan Hallunaj.
Në sallën e gjyqit, mësohet se i arrestuari Bushi nuk ka preferuar të flasë për akuzën e ngritur nga prokuroria “korrupsion pasive të personave që ushtrojnë funksione publike”.
Edhe në mometin e parë të arrestimit, mësohet se Bushi nuk ka preferuar të jap shpjegime se si kanë përfunduar në telefonin e Ilir Memushajt kopje të përgjimeve parandaluese që kryente institucioni i SHISH-it.
Ndërkohë Eno Bushi avokati mbrojtës njëherazi vëllai i të arrestuarit kërkoi lirimin nga qelia, me argumentin se prokruoria nuk provon faktin se është pikërisht vëllai i tij ai që i ka nisur fotot me transkiptimet e përgjimeve Memushaj.
Nga ana tjetër, prokurori Besnik Muçi kërkoi nga togat e zeza që inspektori Bushi të mbetet në qeli për shkak të veprës së rëndë penale që dyshohet se ka konsumuar si dhe dyshimet për prishjen provave nëse ai lirohet nga burgu.
Sipas prokurorisë, inspektori Bushi punon prej vitesh pranë Shërbimit Informativ Shtetëror në sektorin e luftës kundër trafiqeve. Gjatë kësaj kohe, prokuroria pretendon se SHISH për llogari të hetimeve parandaluese të ngjarjeve kriminale po përgjonte një grup nga Fieri të dyshuar për trafik droge.
Në mesin e të përgjuarve ishte edhe Denis Kasa, që mbeti i vrarë në atentatin e mbrëmjes së 8 Janarit në fshatin Mbrostar, në rrugën Fier-Vlorë.
Të gjitha lëvizjet e tij dhe komunikimet që kryente në telefon, inspektori Bushi i dispononte dhe dyshohet se me anë të fotografive i ka dërguar shtetasitr Ilir Memushaj, që dyshohet se bënë pjesë të një grupi tjetër kriminal, rival i viktimës Kasa.
Në këto përgjime, sipas akuzës, që i janë gjetur Ilir Memushajt në telefon, inspektori i tregonte për makinat që Denis Kasa përdorte për lëvizje dhe biseda të tjera që ai kryente.
Sipas akuzës, në momentin e arrestimit të Memushaj në telefonin e tij personal janë gjetur këto foto, që më pas nga verifikimi në zyrat qendrore të SHISH rezultonin se ishin përpunuar dhe zbardhur në kompjuterin e inspektorit Florian Bushi, i cili ka pranuar njohjen me Ilir Memushajn, tashmë i arrestuar si bashkëpunëtor në vrasjen e ndodhur në zonën e Fierit, ku u ekzekutua Denis Kasa dhe u plagosen dy shokët e tij.
*Personi në foto është Florian Bushi, inspektori i Shërbimit Informative Shtetërore.
