Drejtori i përgjithshëm i Organizatës Botërore të Shëndetësisë (OBSH), Tedros Adhanon Ghebreyesus, bëri thirrje që të gjitha vendet e botës t’i dyfishojnë përpjekjet kundër pandemisë së koronavirusit.
Duke folur në Gjenevë, një ditë pasi OBSH-ja e shpalli pandemi sëmundjen që shkakton koronavirusi, COVID-19, ai tha:
“Përshkrimi (i sëmundjes) si pandemi nuk do të thotë që shtetet duhet të heqin dorë”.
Ghebreyesus po ashtu tha se shtetet “duhet të gjejnë balancën midis mbrojtjes së shëndetit, parandalimit të përçarjeve ekonomike dhe sociale dhe respektimit të të drejtave të njeriut”.
Që prej shpërthimit të virusit, ai ka infektuar rreth 128 mijë persona në gjithë botën nga të cilët 68 mijë janë shëruar dhe 4,720 kanë ndërruar jetë.
Vendi më i prekur vijon të mbetet Kina dhe më pas Italia. Në Europë të vetmet vende që nuk kanë raste të konfirmuara janë Mali i Zi dhe Kosova. /Opinion.al
