Kryetari i Organizatës Botërore të Shëndetësisë ka bërë një paralajmërim të qartë, për të rinjtë.
Duke iu referuar epidemisë së koronavirusit, kreu i OBSH-së u shpreh se të rinjtë nuk janë të pathyeshëm. Sipas tij, virusi mund t’ju dërgojë në spital për javë ose edhe mund t’ju vrasë.
Më tej, mjeku bën një apël të fortë ku sqaron se edhe nëse nuk sëmureni, zgjedhja që bëni, mund të bëjë dallimin në mes jetës dhe vdekjes për dikë tjetër.
“Një prej gjërave që jemi duke mësuar ditë pas ditë është që njerëzit e moshuar goditen më së shumti, por as të rinjtë nuk kursehen”, ka thënë Tedros Adhanom Ghebreyesus në Gjenevë.
“Të dhënat nga shumë shtete kanë treguar qartë se njerëzit nën moshën 50-vjeçare përbëjnë një shifër të konsiderueshme të pacientëve që kërkojnë hospitalizim. Sot, unë kam një mesazh për të rinjtë: ju nuk jeni të pathyeshëm, virusi mund t’ju dërgojë në spital për javë ose edhe mund t’ju vrasë. Edhe nëse nuk sëmureni, zgjedhja që bëni, mund të bëjë dallimin mes të jetës dhe vdekjes për dikë tjetër”, u shpreh ai./Opinion.al
