Organizata Botërore e Shëndetësisë ka shpallur ditën e djeshme gjendjen e emergjencës globale për Koronavirusin.
Kjo gjendje shpallet nëse OBSH vlerëson se një event apo sëmundje e caktuar përbën rrezik për shëndetin publik, përmes përhapjes, ndërkaq një vendim i tillë, nxit shtetet të shtojnë përgatitjet apo masat parandaluese kundër përhapjes së virusit.
Mbi bazën e një marrëveshje ndërkombëtare ligjërisht të detyrueshme, 196 shtetet anëtare të OBSH duhet të implementojnë vendimet e organizatës, çka nënkupton një kundërpërgjigjie më të koordinuar ndaj epidemisë.
Mes tyre mund të përfshihen rekomandime si skanime në pikat kufitare apo aeroporte.Megjithatë OBSH nuk këshillon kufizim të lëvizjeve dhe bën thirrje për normalizim të udhëtimeve dhe tregtisë ndërkombëtare.
Për situata të tilla, OBSH ka edhe një fond të caktuar i njohur si fondi i emergjencës. Deri më tani, organizata ka akorduar 1.8 milionë dollarë për të luftuar koronavirusin në rajone të caktuara rreth botës, ndërsa fonde shtesë mund të sigurohen për të trajtuar dhe parandaluar përhapjen e virusit.
Aktualisht vazhdojnë të jenë në fuqi edhe dy emergjenca të tjera ndërkombëtare, ajo për ebolan dhe poliomelitin./Opinion.al
