Gati 26 milionë njerëz mund të jenë prekur nga tërmetet që tronditën Turqinë dhe Sirinë këtë javë, ku u dëmtuan dhjetëra objekte shëndetësore, tha sot Organizata Botërore e Shëndetësisë (OBSH), duke apeluar për financim. OBSH po kërkon ndihmë financiare urgjente prej 42.8 milionë dollarë për të mbuluar nevojat e menjëhershme shëndetësore.
Në fillim të kësaj jave, OBSH, e cila tashmë ka lëshuar 16 milionë dollarë nga fondi i saj i urgjencës, vlerësoi në 23 milionë numrin e njerëzve që mund të ekspozohen pas tërmeteve dhe shkatërrimeve që ata shkaktuan.
Sot, ky numër rritet në 26 milionë, 15 milionë në Turqi dhe pothuajse 11 milionë në Siri.
Midis tyre, më shumë se pesë milionë njerëz konsiderohen veçanërisht “të cenueshëm”, duke përfshirë afro 350,000 të moshuar dhe më shumë se 1.4 milionë fëmijë.
Në Turqi, OBSH vlerëson se më shumë se 4000 ndërtesa u shembën gjatë tërmeteve dhe 15 spitale u dëmtuan pjesërisht ose rëndë.
Në Siri, ku sistemi shëndetësor tashmë është gjunjëzuar pas 12 viteve të luftës, të paktën 20 objekte shëndetësore në pjesën veriperëndimore të vendit, përfshirë katër spitale, u dëmtuan.
OBSH tha se dërgoi 37 tonë furnizime mjekësore për kujdesin e plagëve dhe operacionin urgjent në Turqi të enjten, ndërsa 35 tonë mbërritën në Siri të premten.
“Ato do të përdoren për të trajtuar dhe kujdesur për 100,000 njerëz, si dhe për të kryer 120,000 operacione urgjente në të dy vendet,” tha OBSH, duke shtuar se një fluturim i tretë me një ngarkesë të ngjashme pritej të mbërrinte në Siri të hënën.
Drejtori i Përgjithshëm i OBSH-së Tedros Adhanom Ghebreyesus mbërriti sot në Aleppo të Sirisë, i cili u godit rëndë nga tërmeti./Opinion.al
