Drejtori i Përgjithshëm i Policisë së Shtetit Ardi Veliu, ka reaguar pas publikimit në mbledhjen online të Komisionit të Sigurisë të videos së mamasë së 15-vjeçarit të dhunuar nga policia.
Në këtë video Zaida Çobo shfaqej me pistoletë në dorë, ndërsa Veliu pa shpjeguar lidhjen e videos së mamasë me dhunën e ushtruar ndaj të miturit, tha se “ja nga cila familje vjen djali”.
Pas publikimit, Zaida Çobo, e cila deklaroi se video është xhiruar gjatë filmit “Dashuria nuk mjafton”, ndërsa paralajmëroi se do të bëjë padi në prokurori për prishje imazhi ndaj Veliut.
Ndërkohë, Veliu thotë në reagimin e tij se fjala e tij është nxjerr nga konteksti. Po ashtu, ai thekson se do e mbajë me nder postin e Drejtorit të Përgjithshëm të Policisë së Shtetit.
Veliu shprehet kundër qytetarëve që janë kritik ndaj policisë, ndërsa thekson se puna e tij e deritanishme dhe Policinë e Shtetit kanë treguar rezultate pozitive.
Reagimi
Jam i keqardhur që Policia e Shtetit bëhet rregullisht shënjestra e atyre që kurrë nuk e thanë një fjalë motivuese për të dhe sot përsëri e njëjta gjë.
Ndërkohë që ne jemi organizata më rigoroze në goditjen e fenomeneve brenda vetes, mjafton që një punonjës i ynë të bëjë një gabim dhe megjithëse ndëshkohet në radhë të parë prej nesh, prapëseprapë goditja vijon ndaj Policisë së Shtetit.
Sot unë jam vënë personalisht në shënjestër dhe më vjen keq për deformimin që po i bëhet realitetit të ngjarjes për të cilën fola dhe vetë qasjes sime ndaj saj.
Së pari, fjala ime nuk mund të nxirret nga konteksti siç po bëhet.
Së dyti, kam bërë një ilustrim të idesë se nuk mundet të fajësohet gjithnjë e vetëm punonjësi i Policisë duke u kapur pas një fotoje të rastit, pa konsideruar tërë kontekstin e një situate.
Së treti, kam sqaruar se punonjësi në fjalë është pezulluar dhe ka nisur hetimi disiplinor dhe penal për të.
Së katërti, unë po komunikoja hapur me deputetët, një shqetësim që është i mbarë punonjësve tanë, për demonizimin që i bëhet figurës së Policit të Shtetit dhe nuk doja të thosha më shumë se kaq.
Por në fund dëshiroj t’u them të gjithë atyre që po e gjykojnë me ngut këtë “krim” të radhës, se nëse nuk kam arritur dot ta sqaroj si duhet atë çka kisha qëllim, kjo nuk mjafton për të më gjykuar me qëllim.
Këtë detyrë e kam mbajtur dhe do ta mbaj deri në fund me nder dhe puna ka folur e do të flasë për mua dhe Policinë e Shtetit më mirë se sa fjalët tona.
Ndjesë nëse kam krijuar një keqkuptim me komentin tim dhe besoj se kushdo që do të gjykojë pa paramendim dhe pa e menduar edhe këtë si rastin e radhës për të baltosur Policinë e Shtetit, do të gjejë arsye për ta pranuar ndjesën time!/ Opinion.al
