Me rastin e Ditës së Europës, nxënës nga shkolla të ndryshme të mesme të Tiranës vizituan sallën e Parlamentit shqiptar. Adoleshentët kaluan disa çaste në vendin që gjithmonë e kanë parë nga televizori ku kanë dëgjuar deputetët në debate të ndryshme mbi vendin.
Por, cili është koncepti i tyre për deputetët, punën e legjislativit shqiptar? Në librin e shënimeve, nxënësit kanë shkruar mbresat e tyre, të cilat mund të themi se kanë qenë të larmishme. Dikush ankohet për lagjen në Allias, i bën thirrje deputetët t’i shtrojnë rrugën. Dikush lavdëron pamjet e parlamentit, por kur e vendos në ekuilibra me deputetin, ky i fundit nuk i duket dhe aq për t’u lavdëruar. Një tjetër shpreh simpatinë për Sali Berishën, por një shok i tij shpreh të kundërtën, kurse njëri i ankohet kryeministrit Edi Rama për mungesat. Por ka dhe nga ata që lënë një shënim domethënës si ky më poshtë:
“Shpresojmë të miratoni Reformën në Drejtësi! Shpresojmë të gjeni bashkëpunim dhe të krijoni dialog me njëri-tjetrin, për të mirën e kombit shqiptar”. Me sinqeritet, Taia dhe Frenki, shkolla ‘Ismail Qemali”, 2016.
Kurse dikush tjetër shkruan, “Shpresoj që një ditë të bëheni të denjë për këtë vend, për këtë komb, për këtë vend që nuk po njeh asnjë ditë të mirë! Do të vijë dita që do të largohem nga ky vend, sikur një ditë ta shihja këtë vend megjithëmend të rilindte”./BW
