Nxënësit e shkollës së mesme “Said Najdeni” në Dibër kanë zhvilluar një protestë, për shkak se mësuesja e tyre Fatbardha Miftari është transferuar pa dëshirën e saj në fshatin Mustafë në Arrëz, ku duhet të bëjë çdo ditë pesë orë udhëtim vajtje-ardhje.
Gjatë protestës, ka pasur edhe një konfrontim mes nxënësve dhe rojes së shkollës, i cili mesa duke me urdhër të drejtorisë ka tentuar të heqë disa nga pankartat që nxënësit kishin vendosur në pemët përreth.
Ndërkohë, Partia Demokratike denoncon se transferimi i mësueses është bërë për shkak se nuk ka pranuar të bëhet anëtare e Partisë Socialiste, ndërsa prindërve të nxënësve protestues u është bërë shantazh me vendet e punës.
“Edhe përse kërcënimet kanë qenë nga më të tmerrshmet për ju, për prindërit tuaj për heqje nga puna, për mësues që u janë dhënë vërejtje se ju keni dalë këtu për lirinë e fjalës. Ecni rrugën e drejtësisë”, tha mësuesja Fatbardha Miftari.
“Gjatë mbrëmjes së djeshme ka pasur shumë kërcënime me telefonata për heqjen e prindërve nga puna, apo kërcënime nga më të ndryshmet. Ne nuk do të ndalemi. Edhe përse ka kërcënime, ne do ta çojmë këtë punë deri në fund”, ka thënë një nga nxënësit protestues./Opinion.al
