TIRANË- Një sherr mes të rinjsh, nxënës në shkollës së mesme “Besnik Sykja” në Tiranë gati sa nuk është kthyer në tragjedi. Fillimisht nxënësit janë rrahur me grushte më pas njëri prej tyre është pajisur me pistoletë të cilën e mbante të fshehur në çantën e shoqes së klasës. Ka qenë policia e Tiranës ajo që ka bërë të ditur ngjarjen, duke cilësuar se “u parandalua ngjarja e rëndë kriminale në ambientet shkollore”.
“Janë shoqëruar në komisariat tre nxënës pas informacioneve që policia mori për një sherr të ndodhur tre ditë më parë. “Po mbahet në komisariatin nr 2 të Tiranës 16 vjeçari me iniciale G.F, lindur në Lezhë dhe banues në Tirane, pasi akuzohet për armë pa leje.
Po kështu është shoqëruar M. B, 17 vjeçe, lindur e banuese në Tiranë, edhe kjo nën akuzë për armë pa leje dhe moskallëzim krimi. Ndërsa A. H, 16 vjec, lindur e banues në Tiranë po ndiqet në gjendje të lirë për moskallëzim krimi”, bën të ditur policia.
Ngjarja
Më datë 1 Dhjetor nxënësi i gjimnazit “Besnik Sykja” me iniciale G.F., 16 vjeç, ka shkuar në mbështetje të disa shokëve të tij të cilët ishin duke u konfliktuar me disa persona pranë shkollës 9 vjeçare “Vasil Shanto”.
16 vjeçari pasi është përfshirë në këtë konflikt, ka gjuajtur me grushta njërin nga personat e palës tjetër. Në këto kushte shtetasi G. F, është frikësuar dhe ka shkuar në qytetin e Laçit ku ka marrë një pistolete Ekol, duke e mbajtur me vete në shkollë për vetëmbrojtje. Gjatë procesit të mësimit, ai ia ka dhënë pistoletën shoqes së shkollës me iniciale M. B, për ta mbajtur në çantë.
