Dikur ishin shokë, e madje kanë kryer mjaft krime së bashku. Mirëpo përplasja mes tyre i kaloi kufijtë dhe mori jetët e të afërmve të tyre.
Kjo është shkurtimisht historia mes Nuredin Dumanit dhe Talo Çelës.
Dumani, tashmë bashkëpunëtor i drejtësisë, ka folur për marrëdhënien e tij me Talo Çelën gjatë seancës gjyqësore të dosjes “Plumbi i Artë”.
Ai tregoi se është njohur që prej vitit 2010 me të dhe madje kanë qëndruar te shtëpitë e njëri-tjetrit.
Interesante është njohja e Dumanit me vëllain e Talo Çelës, Bujarit, të cilit do t’ia merrte jetën më 17 Shtator të vitit 2020.
“Jam njohur me të vëllain Bujar Çela, vetëm një herë kam qenë tek shtëpia e tij. Bujari kryente punët e Talos, takonte njerëz, dërgonte porosi etj., pasi punonte si taksist”, ka rrëfyer Nuredin Dumani.
Në sallën e gjyqit, Dumani ka treguar me detaje si u nis për të vrarë Bujar Çelën, por fillimisht dështoi sepse janë pikasur.
“U bëmë gati me dy makina që i kishim vjedhur. Shkuam tek shtëpia e Bujarit në shtëpi nga ora 4:00 e mëngjesit, por aty u diktuam. Dikush na pa dhe u larguam”, ka rrëfyer Dumani.
Por fati i keq i Bujar Çelës ishte se Dumani e njihte shumë mirë. Ai e dinte itinerarin e tij dhe vendin ku çdo mëngjes pinte kafe. Para se ta vriste, Dumani tregoi se ka mbushur makinën me karburant, ka shkuar te lokali dhe më pas e ka vrarë Bujar Çelën.
Arsyeja e ekzekutimit ishte vrasja e Klevis Kapllanit. Nuredin Dumani tregoi se këtë të fundit e kishte shok dhe se është njoftuar nga Enver Diva për ekzekutimin.
Për këtë arsye, Bujar Çela ishte “ngjitur” një vend më lart në “listën e zezë” të Dumanit. Siç ka treguar i penduari i drejtësisë, pasi ka mësuar vrasjen e Kapllanit, Dumani ka folur me Erjon Alibejn ku i është shprehur se do të lerë vrasjen e “Dine Çamit” për të shkuar drejt Çelës.
“E dija që dilte çdo mëngjes dhe shkonte të pinte kafe. Kemi marrë karburant për makinën i hodha 50 mijë Lekë. Sa shkova te lokali e pashë Bujarin. Bujarin vendosëm që ta vrisnim pasi u vra shoku im Klevis Kapllani në 15 Shtator rreth orës 8:00 ose 9:00 të darkës. Enver Diva me nisi mesazh me zë dhe më tha e paskan vrarë Klevisin. Unë në atë kohë rrija në Elbasan tek Arjan Spahiu. Kur shkova për të vrarë “Dine Çamin” i thashë Erjon Alibejt në telefon do e lemë ketë dhe do ikim të vrasim Bujar Çelën”, tregoi Dumani.
Siç e përmendëm në nisje të këtij artikulli miqësia mes Nuredin Dumanit dhe Talo Çelës u thye dhe kjo solli viktima. Dyshohet se Talo Çela ka urdhëruar ekzekutimin e Klevis Kapllanit, shokut të ngushtë të ngushtë të Nuredin Dumanit. Kjo ngjarje ndodhi më 15 Shtator të 2020.
Sipas asaj që del nga dëshmia e Nuredin Dumanit, ky i fundit është kundërpërgjigjur menjëherë për hakmarrje. Vetëm 2 ditë më vonë, 17 Shtator, ai i vrau Talo Çelës vëllain, Bujarin.
Policia arriti ta identifikonte Nuredin Dumanin nga shenjat e gishtave në paratë që kishte dhënë kur kishte mbushur makinën me naftë. E teksa Dumani është vënë në pranga, Talo Çela vijon të jetë një prej personave më të kërkuar në vend.
Kujtojmë se sot po zhvillohet seanca e radhës e dosjes “Plumbi i Artë”, ku Nuredin Dumani vijon me dëshmitë e tij. Ai ka rrëfyer për një listë me kundërshtarë të hartuar me Erjon Alibejn, me qëllim eliminimin e tyre.
Pas arrestimit, Dumani u bë bashkëpunëtor i drejtësisë dhe dëshmitë e tij kanë zbuluar disa nga ngjarjet më të rënda kriminale në vendin tonë./tvklan.al
