I penduari i drejtësisë, Nuredin Dumani, ka folur në seancën e kësaj të enjteje për disa nga krimet që ka kryer në bashkëpunim me disa nga të akuzuarit e dosjes “Plumbi i Artë”.
Sipas Klan News mësohet se ai ka dëshmuar për grabitjen e argjendarit Lirak Bajraktari në rrugën Elbasan – Bradashesh.
Në përgjigje të pyetjeve të avokatit të Gentian Sharrës, ai ka treguar se çfarë ka ndodhur para dhe pas grabitjes, që u krye poshtë banesës së tregtarit.
“Ishte grabitja më e madhe, ndodhi në fund të 2011 ose fillim të 2012-ës. Gentiani më tha që unë do ta godisja i pari me një levë hekuri, ndërsa Ilirjan Feçja do bënte grabitjen, ndërsa Talo dhe Gentiani do na prisnin në makinë. Vendi i grabitjes ishte në parking. Grabitja është kryer në 7 të mëngjesit ose 8. Në atë grabitje ne i morëm 2 çanta. Pasi e kam goditur me levë, morëm një çantë unë, një cantë Ilirjani. Emrin e viktimës nuk e kam fiksuar se nuk më ka interesuar. Të dyja çantat kishin bizhuteri të ndryshme dhe disa ora. Flori kanë qenë 8 kile e 300 gramë, pa orat”.
Gjatë seancës ka pasur debat mes dy të akuzuarve, Gentian Sharrës dhe Nuredin Dumanit. Avokati i Sharrës e ka pyetur Dumanin nëse ka bërë ndonjë vjedhje në Kavajë.
“Po, kam bërë me klientin tënd. Kam qene unë, Talo Çela, Gentian Sharra dhe Ilirjan Feçi. Kemi grabitur 20 milionë, i kemi ndarë në mënyrë të barabartë secili nga 5”.
Por kjo dëshmi u kundërshtua nga Sharra, i cili e akuzoi Dumanin për deklarim të rremë. Sipas tij, ka bërë 5 deklarata të ndryshme, dhe i ndryshon fjalët javë për javë.
Dumani më pas ka dëshmuar edhe për një grabitje tjetër ndaj një kambisti, kësaj radhe sërish në Elbasan, krim i ndodhur në vitin 2018.
“Pasi ka dalë kambisti nga shtëpia, i jemi afruar me makinë. Unë kam zbritur e i kam thënë ulu në tokë, ai më tha gjuaj duke kundërshtuar. Unë e kam qëlluar një ose dy herë në gjoks dhe një herë në kupën e gjurit. Pasi morëm paratë jemi larguar. Unë kam marrë 17-20 milionë Lekë, të njëjtën shumë ka marrë edhe Dorian Shkoza, Ardian Çollaku, Gent Sharra dhe Talo Çela”.
Gjatë seancës së pyetjeve të avokatit të Gentian Sharrës, Dumani është pyetur edhe nëse donte të vriste klientin e tij. Dumani u shpreh se po të donte të vriste Sharrën nuk do të ishte në kafazin e gjykatës.
