Në portalin e-Albania ofrohen shërbime të ndryshme e ndër të tjera mund të kryhen pagesa elektronike. Shqetësimi i sotëm në emisionin “Stop” në Tv Klan ka të bëjë pikërisht me këtë portal, pasi shtetas që jetojën në Gjermani apo Austri dhe që kanë hequr dorë nga shtetësia shqiptare, nuk mund ta përdorin këtë aplikacion.
Një zonjë thotë se nuk mund të paguajë ujin apo dritat dhe nuk mund të udhëtojë enkas nga Austria për këtë qëllim.
Qytetarja: Përshëndetje! Unë jam një shtetase shqiptare, që jetoj në Austri prej afërsisht tre dekadash. Edhe shteti ku jetojmë këtu, nuk e njeh dyshtetësinë edhe jemi detyruar e kemi hequr pothuajse që 3 vjeç që kemi ardhur këtu nënshtetësinë dhe kemi nënshtetësinë austriake. Tani, problemi im është, që ne kemi disa detyrime aty në Shqipëri. Nuk lejohemi që të bëjmë pagesat me e-Albania.
Gazetarja: Çfarë detyrimesh duhet të paguani në e-Albania, çfarë nevojash ju kanë lindur për të pasur aplikacionin?
Qytetarja: Tani, për ta pasur aplikacionin, na ka lindur nevoja për pagesat vjetore, që kemi detyrimet e një hyrjeje që kemi në Shqipëri, dritat, uji. Dhe nuk duhet të vijmë neve ekstra nga Austria për të paguar këto detyrime. Përderisa ne jemi shqiptarë edhe nuk na lejohet se na thonë keni hequr nënshtetësinë.
Gazetarja: Prej sa kohësh e keni këtë hyrje, këtë banesë?
Qytetarja: Këtë hyrje, këtë banesë e kemi prej sa kemi ikur.
Gazetarja: Dhe si ia keni bërë deri tani me pagesën e detyrimeve ndaj hyrjes?
Qytetarja: Me pagesën e detyrimeve me kushërinjtë. Thoji njërit, thoji tjetrit. Tani edhe ata janë në punë, janë të zënë. Nuk duhet, që t’i pengojmë me këto gjëra.
“Stop” interesohet pranë Agjencisë Kombëtare të Shoqërisë së Informacionit ku na thuhet se ky shërbim nuk mund të ofrohet. Sugjerimi i AKSHI-t është që ata që kanë këtë problem të interesohen pranë institucioneve ku kërkohet shërbimi./tvklan.al
