Shkëlzen Berisha ka reaguar pasi nuk u paraqit sot për të dëshmuar në seancën gjyqësore ndaj Fatmir Mediut për çështjen “Gërdëci”.
Në një reagim në rrjetet sociale, ai mohuar që të ketë pasur një fletëthirrje për të qenë i pranishëm, ditën e sotme, në seancën për “Gërdecin”.
Pas akuzave ndaj SPAK si një institucion i kapur nga kryeministri Edi Rama, Shkëlzen Berisha theksoi se në adresë të tij nuk ka mbërritur ftesë për t’u paraqitur për të dëshmuar!
Ai thotë se është i gatshëm që të paraqitet sapo të ketë një ftesë të tillë.
“Në lidhje me disa raportime mediatike për “mos paraqitjen” time si dëshmitar në gjykatë, më duhet të sqaroj se ne asnjë adrese timen fizike apo elektronike nuk ka mbërritur asnjë ftesë për t’u paraqitur për të dëshmuar! Pretendimet e SPAK, që janë qartaz në funksion të qëllimeve politike e mediatike të Edi Ramës, bien poshtë, si nga njoftimet e mëparshme që janë ekzekutuar me sukses, ashtu dhe nga fakti që personalisht në dëshminë e dhënë para SPAK kam depozituar adresën e saktë, si dhe nr e telefonit! Mbetem i hapur për t’u paraqitur konform ligjit me të marre ftesën”, shkruan Shkëlzen Berisha.
