Prokuroria e Tiranës ka kërkuar dënimin me 10 milionë lekë (të reja) gjobë për biznesmenin Rezart Taçi. Biznesmeni i naftës në Shqipëri akuzohet për mospagim taksash, në vlerën e rreth 6 milionë dollarëve për disa vite.
Përveç dënimit me gjobë, Prokuroria ka kërkuar edhe heqjen e të drejtës për të qënë administrator i çdolloj kompanie për dy vite. Sipas prokurorisë, dyshohet se bizneset e Taçit, për disa vite me radhë nuk kanë shlyer detyrimet në shtet.
Pavarësisht dënimit, biznesmeni vazhdon të jetë debitor në shtet dhe detyrimet e tij duhet t’i paguajë.
Rezart Taçi është objekt i një hetimi edhe nga autoritet zviceriane dhe pikërisht nga Prokuroria e Gjenevës. Dy kompani të huaja, që kanë patur marrëdhënie biznesi me Taçin e kanë kallëzuar për mashtrim, falsifikim të dokumentave dhe falsifikim të vulave dhe stampave.
Mësohet se autoritet zviceriane kanë sjellë letër porosi në Tiranë, ku kërkojnë informacione dhe kanë lënë detyra për të pyetur disa persona.
