Ish-kryeministri, Sali Berisha, ka komentuar qëndrimin e të Ngarkuarit me punë në Ambasadën Amerikane, David Wisner, i cili në një intervistë mediat nuk pranoi të komentonte sulmet që Sali Berisha i bën SPAK, duke e quajtur ish-kryeministrin “një të sanksionuar”.
Në konferencën për mediat të mbajtur sot, Berisha tha se nëse del një dokument që e bazon këtë vendim ndaj tij për non-gratën, ai do të bënte zgjidhjen e tij.
“Nuk kam ndërmend të komentoj deklaratat e të ngarkuarit me punë të SHBA. Ai shprehet se nuk komentoj deklaratat e një personi non-grata. Që këtu s’më takon të komentoj më tutje këtë problem. Por ka një rrugë, që të paraqitet një dokument i vetëm, që të faktohet ajo që flitet në vendim dhe unë të bëjë zgjidhen. Mesa kuptova në atë intervistë, ishte një përgjigje kundër rrezikut anglo-amerikan të Ramës të shpallur në Kongresin e Partisë. Rama e kishte atë kontributin anglo-amerikan. Anglezët erdhën në zyrën time, folëm gjatë dhe më pas e panë që nuk ishte punë reforme”, -tha Berisha.
Konkretisht Wisner u pyet se si i komentonte deklaratat e Berishës që e cilësonte SPAK-un si “kamxhikun e Ramës”.
Wisner tha: Nuk do t’i përgjigjem dikujt që është sanksionuar nga Shtetet e Bashkuara për korrupsion madhor. Shtetet e Bashkuara janë krenare të mbështesin punën e SPAK-ut dhe institucioneve të tjera të drejtësisë dhe do të vazhdojmë të mbështesim kërkesat e popullit shqiptar për t’i dhënë fund pandëshkueshmërisë. Siç e vërejta, kemi investuar fort në suksesin e reformave në drejtësi të Shqipërisë, përfshi SPAK, përmes ekspertizës, financimit dhe mbështetjes sonë politike. Jemi krenarë të jemi partnerë me Shqipërinë. Çdo shqiptar meriton të jetojë në një vend ku secili është i barabartë përpara ligjit, ku shteti ligjor funksionon dhe ku secili ka një mundësi të barabartë për begati. Jo vetëm sepse e kërkon e ardhmja euro-atlantike e Shqipërisë, por sepse është gjëja e duhur.
