Kompania e KEDS-it kishte kërkuar nga Përmbaruesi Privat që kryefamiljarit Bislim Haliti nga fshati Dvorishtë komuna e Podujevës t’i shqiptohet masa e dënimit me 5 muaj burg ose t’i konfiskohet pasuri familjare pasi ky i fundit i ka borxh për energjinë elektrike, kompanisë së KEDS-it 1279.43 euro.
Mirëpo familja prej pesë anëtarësh e Halitit jeton në kushte të vështira ekonomike madje në një kohë nuk kishte marr as asistencën sociale.
Hoxha i Xhamisë së Vjetër në Podujevë, Imri Llugaliu tregon se si kompania KEDS ia kishte marrë familjes Haliti, lopën për shkak të borxhit.
“Pasi Bislimi jeton në kushte të vështira dhe me asistencë sociale ai nuk kishte para të paguaj borxhin e rrymës. Kështu Bislimi është detyruar të jap lopën vlerën e të cilës nuk e kanë llogaritur as sa gjysma e saj”, ka thënë hoxha duke shtuar se me pas Bislimi kishte mbetur vetëm në duart e bamirësve.
Borxhet e të pasurve kanë arritur në miliona kurse KEDS-i gjeti fukarenjtë për të kryer si duhet punën e tyre”, tha ai.
Hoxha njihet edhe nga banorët e Podujevës për bamirësi, nuk kishte qëndruar duke heshtur por me iniciativën e shumë banorëve kishin blerë dy lopë për dy familje të varfra.
“Me iniciativën e Xhamisë së vjetër në Podujevë ne sot realizuam projektin për blerjen e dy lopëve ku njërën ia dërguam kryefamiljarit Bislim Haliti dhe tjetrën një familje skamnore nga fshati Ballofc në Podujevë. Bamirësit të cilët na ndihmuan për këtë janë nga Zvicra dhe Gjermania dhe i falënderojmë shumë”, tha ai.
