“Mohoj dhe refuzoj përmbajtjen e artikullit të publikuar nga New York Times, i cili po qarkullon në mediat ndërkombëtare. Jam thellësisht e shokuar që lexoj lajme që janë tërësisht false. Nuk kam pasur kurrë asnjë lidhje seksuale me Jimmy Bennet”.
Aktorja italiane Asia Argento, thyen heshtjen dhe replikon me anë të një deklarate.
“Nuk kam zgjidhje tjetër përveçse t’iu kthehem kundër të gjithë deklaratave të rreme dhe të mbrohem në çdo mënyrë”, thotë aktorja.
Ndërkohë janë publikuar disa mesazhe mes saj dhe ish-të dashurit të asaj kohe, Anthony Bourdain.
Argento shton se Anthony e mbylli çështjen në mënyrë private, “Bennet më thoshte se isha ëndrra e tij seksuale qysh kur ishte 12 vjeç dhe donte të ishte sipër meje. Anthony druante se kjo çështje mund të dëmtonte reputacionin tim, kështu që e ndihmoi Bennet ekonomikisht me kusht që të mos ndërhynte në jetën tonë”.
Mësohet se Asia Argento ka paguar plotë 380 mijë dollarë ndaj aktorit amerikan Jimmy Bennett, i cili pretendon se është ngacmuar seksualisht nga ana e aktores italiane në vitin 2013, kur ai ishte vetëm 17 vjeç.
Mediat amerikane shkruajnë se sipas Bennet, abuzimi ka ndodhur në një dhomë hoteli në California, SHBA. Ajo dhe i riu interpretonin në një film, ku Argento luante rolin e nënës prostitutë të aktorit të ri.
Sipas avokatëve të Bennett, bëhet fjalë për një abuzim seksual që e ka terrorizuar të riun, duke rrezikuar seriozisht shëndetin e tij mendor.
Në denoncimin e tyre, avokatët kërkuan një dëmshpërblim prej 3.5 milionë dollarësh, për dëmtim të sferës emocionale dhe humbjes së roleve pas abuzimit të pësuar.
‘New York Times’ shkruan se ka marrë dokumente përfshi dhe një fotografi selfie të dy aktorëve në shtrat, shkruan noa.al.
Ndërkohë pas negociatave marrëveshja u përmbyll pak kohë më parë, ku Asia u detyrua të paguajë 380 mijë dollarë.
