Neurokirurgu shqiptar Kita Sallabanda prej vitesh jeton e punon në Spanjë dhe ka ndërtuar atje një emër të suksesshëm në fushën e tij të mjekësisë. Gjatë emisionit “Opinion” në Tv Klan ai rrëfeu për kryerjen e specializimit në Spanjë pas përfundimit të studimeve ku perceptonte diferencën krahasuar me nivelin në Shqipëri.
Por disa vite më vonë, do të vinte momenti që të largohej sërish nga Shqipëria, këtë herë për t’u vendosur në Spanjë, një vendim që e mori nisur nga dashuria për familjen. Nëna e tij e cila ishte spanjolle, ishte kthyer përfundimisht në Spanjë në vitin 2000. Ndërkohë Sallabanda ruante kontaktet me familjarët të cilët e ndihmonin për të siguruar materialet mjekësore që mungonin në Shqipëri.
Blendi Fevziu: Ndërkohë, u kthyet në Shqipëri, qëndruat një periudhë kohe dhe më pas u kthyet në Spanjë. Sa e vështirë ishte për një mjek të largohej nga Shqipëria ku kishte një karrierë gati 15-vjeçare, pavarësisht viteve që bëtë specializimin në Spanjë?
Kita Sallabanda: Është një pyetje që ia kam bërë vetes dhe ma kanë bërë. E para, pse vajte në Spanjë? Desha të thoja që unë kisha gjithmonë një dashuri për familjen time në Spanjë. Ishte diçka që për shumë vite…
Blendi Fevziu: I ruanit konktaktet me ta?
Kita Sallabanda: Po, i ruanim, madje dy dajat e mi, njëri ishte mjek, tjetri ishte ndihmës mjek, më dërgonin shumë materiale mjekësore, stetoskop që s’kishte në Shqipëri.
Blendi Fevziu: Stetoskop?
Kita Sallabanda: Po, stetoskopin ma dërgonin që nga Spanja dhe unë kisha një dashuri për familjen time në Spanjë. Ishte diçka që ishte e ndaluar, e ndaluar, e ndaluar dhe kur unë pata mundësinë të shkoja në Spanjë, vendosa të ndryshoj jetën dhe të shkoja. Jetova 38 vjet në Shqipëri dhe mendova që në atë moshë të ndërroja jetën dhe të shkoja pranë familjes time në Spanjë./tvklan.al
