Presidenti amerikan Donald Trump ka pezulluar një politikë që do të lejonte refugjatët afganë që plotësojnë disa kritere të rivendosen në SHBA.
Në një artikull, Euronews thotë se në Shqipëri, mijëra afganë që u larguan nga vendi i tyre për t’i shpëtuar pushtimit të talebanëve po përballen me pasiguri teksa presin miratimin e vizave amerikane.
Mes tërheqjes së ushtrisë amerikane nga Afganistani dhe rritjes së dhunës së talebanëve, Shtetet e Bashkuara nën Presidentin Biden zgjeruan sferën e qytetarëve afganë të kualifikuar për statusin e refugjatit në SHBA.
Më shumë se 3200 afganë, shumë prej të cilëve ishin kualifikuar për një Vizë Speciale Emigruese (SIV), po qëndrojnë në Shqipëri.
Pasi arritën atje, ata u intervistuan dhe u kërkua të siguronin dokumentacionin e nevojshëm për të vazhduar me aplikimet e tyre.
Por në ditët e para në detyrë, administrata e Presidentit Trump njoftoi se Programi Amerikan i Pranimit të Refugjatëve do të pezullohej nga 27 janari për të paktën tre muaj.
Gjatë asaj periudhe, Shtëpia e Bardhë tha se Sekretari i Sigurisë Kombëtare në konsultim me Sekretarin e Shtetit do t’i paraqesë një raport presidentit nëse rifillimi i programit është në interes të SHBA-së.
Refugjatëve të cilëve u ishte miratuar të udhëtonin në Shtetet e Bashkuara para 27 janarit u anuluan planet e tyre të udhëtimit nga administrata Trump.
Mes të prekurve janë më shumë se 1600 afganë të lejuar për t’u zhvendosur në SHBA.
Ky numër përfshin ata që kanë punuar së bashku me ushtarët amerikanë gjatë luftës, si dhe anëtarët e familjeve të personelit ushtarak amerikan në detyrë.
Shumë refugjatë afganë në Shqipëri ende shpresojnë se Uashingtoni do të përmbushë premtimin e tij për t’i pranuar ata, larg regjimit shtypës të talebanëve.
Pavarësisht premtimeve fillestare për një sundim më të moderuar, talebanët shpejt filluan të zbatojnë kufizime për gratë dhe vajzat, duke i ndaluar ato nga hapësirat publike dhe shumica e vendeve të punës, si dhe duke ndaluar arsimimin për vajzat përtej klasës së gjashtë.
Në Shëngjin, një qytet në bregdetin e Adriatikut rreth 70 kilometra në veriperëndim të kryeqytetit shqiptar të Tiranës, qindra afganë iu dhanë strehim të përkohshëm.
Palwasha, e cila është me burrin e saj, tre vajzat adoleshente dhe një djalë, tha se ajo u thirr për një intervistë të dytë për të sqaruar dokumentacionin e saj, por iu tha që të “integrohej” në Shqipëri.
“Nuk është e lehtë për mua të integrohem në Shqipëri. Unë nuk di shqip. Nuk më kanë sjellë këtu për t’u integruar në Shqipëri. Dhe është shumë e vështirë edhe për shqiptarët që të kenë një punë dhe mundësi punësimi në vendin e tyre. Pra si ne mund të jetojë këtu”, tha ajo.
Mijëra afganë kanë qëndruar në resortet turistike të Shqipërisë përgjatë detit Adriatik.
Një anëtare e NATO-s, Shqipëria fillimisht ra dakord të strehonte afganët e arratisur për një vit përpara zgjidhjes së tyre përfundimtare në SHBA, më pas u zotua t’i mbante ata më gjatë nëse vizat e tyre vonoheshin./Opinion.al
