Një histori e rëndë e ndodhur 14 vite më parë në Greqi është rikthyer në vëmendjen e mediave greke.
Bëhet fjalë për një 48-vjeçar çeçen, të dënuar me burgim të përjetshëm nga Gjykata e Selanikut për vrasjen e një shqiptari.
Historia nisi në vitin 2014, kur një 43-vjeçar shqiptar në Greqi u ekzekutua në mënyrë mizore në një krim me porosi.
Shqiptari, i cili ishte i divorcuar dhe me 2 fëmijë, kishte krijuar lidhje dashurie me një vajzë 30-vjeçare greke, 13 vjet më të vogël se ai. Të dy ata u martuan në Maj të vitit 2014.
Por familja e vajzës, të cilët e njihnin shqiptarin dhe kishin miqësi, nuk e pranonin këtë martesë me argumentin se ai ishte i varfër, i divorcuar dhe me 2 fëmijë. Babai i 30-vjeçares kishte tentuar disa herë të ndante çiftin, duke shkuar në shtëpinë e tyre dhe debatonte me të bijën që të braktiste 43-vjeçarin.
43-vjeçari shqiptar, pas shqetësimeve të herë pas hershme nga vjehrri, kishte marrë urdhër mbrojtje në polici dhe babait të vajzës nuk i lejohej që t’ju afrohej.
Në këto kushte, babai i vajzës pajtoi një shtetas çeçen që kishte dalë nga burgu për vrasje kohët e fundit dhe i kërkoi që të vriste shqiptarin. Për këtë i ofroi 2500 Euro, nga të cilat 1500 ia dha paradhënie dhe pjesën tjetër më pas.
Shtetasi çeçen, së bashku me nipin e tij, hartuan planin për vrasjen e 43-vjeçarit shqiptar. Ata i bllokuan rrugën me makinë dhe e bindën atë të dilte nga automjeti me pretendimin se donin të bisedonin me të. Pasi doli nga mjeti, e morën me forcë dhe e futën në makinën e tyre duke e çuar në një zonë të pyllëzuar. Aty e dhunuan dhe e mbytën me litar, më pas trupin e groposën.
Krimi u zbardh në atë kohë nga autoritetet greke dhe gjykata e Selanikut e dënoi çeçenin me burgim të përjetshëm. Por tashmë ky i fundit ka apeluar dënimin dhe kërkon anulimin e këtij vendimi.
