I dërguari special i Washington-it për Ballkanin Perëndimor, Gabriel Escobar shprehet se SHBA e ka të qartë që nuk mund të ketë lëvizje të njëanshme nga ana e Kosovës sa i përket marrëdhënies me serbët e Kosovës, përfshi këtu edhe vendimin për ndalimin e dinarit. Nëse Prishtina vijon të njëjtën sjellje ai paralajmëron pasoja për Kosovën.
“Çështja e dinarit duhet të zgjidhet përmes dialogut të ndërmjetësuar nga ana e BE-së. Për këto çështje duhet të komunikohen afate që nuk prekin popullatën. Kosova e ka plotësisht të qartë se nuk mund të ketë lëvizje të njëanshme sepse lëvizje të tilla do të kenë pasoja. Ne jemi të gatshëm të ndihmojmë në zgjidhjen e problemit, por dialogu mbetet i vetmi kanal për zgjidhjen e çështjeve të të dyja palëve. Beogradi dhe Prishtina duhet të respektojnë marrëveshjet ekzistuese ku prioritare është themelimi i bashkësisë të komunave me shumicë serbe”, tha Escobar.
Në të njëjtën linjë është edhe Ndihmëssekretari amerikan i Shtetit për Europën dhe Euroazinë, James O’Brien, i cili thotë se Shtetet e Bashkuara mund të mos e trajtojnë Kosovën si partnere, nëse ajo merr vendime pa u konsultuar me të, siç është edhe rasti për ndalimin e dinarit.
Ndërsa kryeministri i Kosovës, Albin Kurti, ka akuzuar presidentin serb, Aleksandar Vuçiç se nuk po e nënshkruan Marrëveshjen e Brukselit, me qëllim që të lërë të hapur mundësinë për pushtimin e Kosovës.
“Nënshkrimi i Marrëveshjes me mirëbesim mes Kosovës dhe Serbisë është një kërkesë më urgjente se kurrë. Duke mos e nënshkruar, Vuçiç dëshiron që ta mbajë të hapur opsionin e pushtimit të Kosovës. Sulmi si në Banjskë mund të përsëritet, por kjo deri më tani s’ka ndodhur për shkak të patrullimeve të përbashkëta mes Policisë së Kosovës dhe ushtarëve të NATO-s”, tha Kurti.
Sipas Kurtit, Vuçiç e përdor kërcënimin për agresionin ndaj Kosovës për t’i mbajtur raportet e mira me Rusinë e Kinën.
