Vendimi i Bankës së Shqipërisë për të ulur normën bazë dy herë në gjashtëmujorin e dytë të vitit të kaluar, bëri që kreditë e reja në Lekë të jenë relativisht të qëndrueshme dhe më të lira në tre muajt e parë të këtij viti. Këto u bënë të ditura në raportin më të fundit të Politikës Monetare të Bankës Qendrore.
Interesi i kredisë së re për bizneset rezultoi mesatarisht 6.4% në tremujorin e parë të vitit, duke mbetur i pandryshuar nga tremujori i kaluar dhe lehtësisht më poshtë se mesatarja e vitit 2024, prej 6.6% thuhet në raportin e Bankës së Shqipërisë.
Nga ana tjetër për individët, normat në Lekë janë ulur për kreditë konsumatore në 8.2%, nga 8.5% që shënonin në tremujorin e fundit të vitit 2025. Ndërsa norma e interesit për kreditë hipotekore shënoi vlerën 3.7% përgjatë periudhës Janar-Mars të këtij vit, duke mbetur e njëjtë me atë të tremujorit paraardhës të 2024.
Paralelisht me normat e kredive në Lekë edhe normat e interesit për kreditë në Euro kanë vijuar rënien në tremujorin e parë të 2025, kjo si pasojë e lehtësimit të shpejtë të politikës monetare nga Banka Qendrore Europiane që është reflektuar në normat referencë të monedhës Euro në tregun ndërkombëtar.
Interesi mesatar i kredisë së re në Euro për bizneset shënoi vlerën 5.7% në 3 muajt e parë të 2025, nga 6.1% që ishte në gjashtëmujorin e dytë të vitit të kaluar. Ndërkohë, interesi mesatar i kredisë hipotekore në Euro për individët, pas rënies së shpejtë në tremujorët e mëparshëm, regjistroi një ulje minimale prej 0.1% në periudhën Janar-Mars të 2025, duke u ndalur në 4.8%.
Referuar Bankës së Shqipërisë, diferenca e interesave të kredisë mes Lekut dhe Euros prej muajit Gusht të vitit të kaluar ka kaluar në territor pozitiv për bizneset, ndërkohë që mbetet negative, por në zvogëlim, për financimin e blerjes së banesave tek individët. TvKlan
