Pasi bllokuan seancën parlamentare, demokrati Flamur Noka nuk i ka kursyer akuzat ndaj Presidentit të Republikës Bajram Begaj, i cili sot kishte parashikuar të mbante një fjalë në foltoren e Kuvendit.
Noka tha se Begaj erdhi në parlament si shërbëtor i kryeministrit Edi Rama për të “bekuar” ndryshimet e ligjit që dhunon opozitën.
Sipas Nokës, Presidenti tashmë është bërë pjesë e propagandës së qeverisë, teksa paralajëmroi vijimin aksionit opozitar në parlament.
“Presidenti erdhi si shërbëtor i përulur i Edi Ramës për të bekuar ndryshimet e ligjit që dhunon opozitën, ndryshimet e ligjit që i heq opozitës çdo të drejtë kushtetuese. Erdhi si një ministër propagande. Sot Presidenti i Republikës u pa qartë para gjithë shqiptarëve se nuk është faktor bashkues dhe siç e thotë kushtetuta, unitet i kombit, por erdhi si ministër për të bërë propagandë për ashpërsimin e diktutaturës dhe për mbylljen e çdo hapësire lirie dhe kushtetuese për opozitën. Sot Edi Rama vetëm e thelloi skandalin e opozitës, sot presidenti ishte vetëm një faktor destabiliteti me sjelljen e tij dhe asgjë tjetër më shumë. Pra këto janë të gjitha arsye plus që opozita do të vazhdojë aksionin dhe mosbindja civile është zgjidhja e vetme për të shpëtuar nga zgjedha e këtij regjimi kriminal”,-tha Noka.
Pasi iu anulua fjala në parlament, Begaj do e mbajë fjalën e tij nëpërmjet një konference në Presidencë./Opinion.al
