Sekretari i përgjithshëm i Partisë Demokratike, Flamur Noka ka folur për mediat pas mbylljes së protestës së opozitës.
Përpara selisë së PD-së, Noka falënderoi qytetarët që ishin pjesë e protestës dhe u shpreh se sot foli shumica e shqiptarëve.
“Falënderoj qindra dhe mijëra qytetarë, opozitarë dhe kundërshtarët të këtij regjimi që morën pjesë në këtë protestë madhështore. Të gjitha ata që protestuan se shpirti i qëndresës, treguan se shqiptarët e lirë nuk nënshtrohen, protestuan kundër këtij regjimi. Mesazhi i çdo qytetari ishte që Shqipëria kërkon demokraci dhe Shqipëria nuk mund të pranojë që të këtë liderin e opozitës të burgosur politik, Shqipëria nuk mund të jetë i vetmi vend që zgjedhjet vidhen
Mesazhi ishte i qartë, regjimi i narkos duhet të dëgjojë zërin e qytetarëve. Sot foli shumica e shqiptarëve. Ne jemi të vendosur, nuk ka kthim prapa. Lirimi i liderit të opozitës dhe qeveria teknike. Do të qëndrojmë, do luftojmë dhe do fitojmë. Opozita është në këmbë dhe do jetë në këmbë derisa të arrijmë qëllimin”, tha Noka.
Në përfundim të fjalës së tij Noka kishte edhe një mesazh për Lulzim Bashën.
“Sot Shqipëria ka një PD më të bashkuar dhe më të fuqishme dhe më të bashkuar se kurrë. Kjo protestë këtë demonstroi”, përfundoi Noka.
