Historia e vëllezërve Xhaka, Taulantit dhe më të voglit Granitit, u bë edhe më e përfolur gjatë përballjes së Kombëtareve të Shqipërisë dhe Zvicrës. Taulanti me ngjyrat shqiptare dhe Graniti me ato të Zvicrës u përballën në fushë në një ndeshje që u përcoll me shumë emocione edhe në opinonin publik.
Graniti madje para ndeshjes shkroi një letër të hapur për Taulantin duke thënë që ata do ishin gjithmonë të bashkuar edhe nëse luanin në skuadra të ndryshme duke mos e uruar një tjetër përballje si kundërshtarë, edhe pse ishte thjesht një përballje sportive.
Dje, sërish Graniti, ka postuar disa foto me Taulantin, ndërsa sot ka habitur edhe më shumë ndjekësit e tij me një postim shkruan “Tre vëllezër, tre kombëtare”. Në foto bashkë me Granitin dhe Taulantin, shfaqet edhe i treti Agon Xhaka i cili mesa duket ka marrë ftesë për të luajtur me Kombëtaren e Kosovës që është njohur këtë vit nga FIFA duke e çuar në tre numrin e kombëtareve të ndryshme për të cilat luajnë Xhakat
Agon Xhaka, 19 vjeçar, aktualisht luan në kampionatin e Kosovës. Në venat e fisit të këtyre djemve rrjedh me siguri futboll. Pak ditë më parë, mësuam madje që edhe mamaja e Armando Sadikut vjen nga fisi i Xhakajve nga Podujeva.
