Deri para pak muajsh ishte një femër e thjeshtë që punonte si prokurore në Prokurorinë e qytetit të saj të lindjes, në Gostivar. Megjithse ajo njihej si një femër shumë e zonja, por që duhej të vinte dikush nga jashtë për të zbuluar aftësinë e saj në punën që bën. Afera e përgjimeve që ndodhi në Maqedoni zbuloi shumë të palara në politikën sllavomaqedonase, e pikërisht kjo prokurore shqiptare filloi të tundë politikanët në shtetin fqinj.
Fatime Fetai, një femër e veshur me shumë elegancë e flokë balluke, në konferencën e parë për shtyp, zgjoi shpresa te qytetarët e Maqedonisë. Ajo aty zbuloi aktpaditë që prokuroria speciale kishte ngritur ndaj funksionarëve të lartë shtetërorë duke mos iu trembur syri fare. Ndërkohë ka shumë pak informacione mbi të, pasi për momentin është zonja e hekurt që nuk mund t’i afrohet kush e madje as ta intervistojë. E vetmja fjalë për mediat që ka thënë jashtë konferencave për shtyp ka qenë: ”E kemi shumë të vështirë, por do t’ia dalim!”.
