Ministrja e Mbrojtjes Mimi Kodheli, ka përcjellë për opinionin publik fjalët e kreut të NATO-s, në lidhje me kontributin e Forcave të Armatosura të Shqipërisë.
Me anë të një postimi në rrjetin social facebook, Kodheli shkruan:
“Sekretari i Përgjithshëm i NATO-s Jens Stoltenberg vlerëson kontributin e Shqipërisë si faktor stabiliteti në rajon. Stoltenerg vlerësoi gjithashtu kontributin ushtarak të vendit tonë si dhe pjesëmarrjen e saj si pjesë e koalicionit në luftën kundër ISIS. Qeveria shqiptare dhe Forcat e Armatosura të Shqipërisë mbeten të vendosura për të kontribuuar për paqen dhe sigurinë kudo në botë”, ishte komenti i Znj. Kodheli.
Ndërkohë, pas këtyre fjalëve inkurajuese, ushtria shqiptare ka nxjerrë flotën e saj detare në ujërat e gjirit të Vlorës.
“Sezoni turistik është në prag. Fluksi i lëvizjes në det rritet, rreziku gjithashtu. Emergjencat në det janë komplet tjetër gjë. Për këto dhe të tjera problematika si parandalimi i trafiqeve në det, ishte qëllimi i stërvitjes ndërinstitucionale ‘Vlora Sarex 16’”, – bënte të ditur më tej ministrja.
Në fotot e përcjella, dallohen disa motovedeta të rojes bregdetare si dhe disa motoskafë të ushtrisë në stërvitje.
